2014年港姐亞軍王卓淇，挾住「碩士法拉」個朵加入娛圈，之前同過坤哥吳業坤傳出地下情，不過有指龔嘉欣介入，搞到王卓淇傷心斬纜。

不過有樣有學歷嘅王卓淇，唔愁冇男友，新歡仲要來頭幾猛，係國內有名嘅賽車手富二代黃巨榮，王卓淇日前將同男友嘅合照放上Ig，留言話「係開心嘅」、「應承會同大家講」，宣佈封盤。

今日有報道指王卓淇新歡黃巨榮，今年27歲，熱愛賽車，曾經喺國內賽事拎過冠軍，喺內地賽車界有「中山二少」之稱。有指黃巨榮老竇係中山富豪，主力搞房地產同酒店。而黃巨榮自少就俾老竇送去加拿大同英國讀書。

而本身家底唔差嘅王卓淇，原來父母同黃巨榮屋企係世交，早幾個月，王卓淇就經父母悉心安排下，同黃巨榮進行「相睇」，結果一拍即合！