人人都愛打機，但當虛擬世界的競技要變為現實的職業，就要付出一定的汗水。現為電競導師的Daniel中五時為了做電競選手而放棄「華仁仔」的身份，曾經覺得「打機會做乞兒」的父親Joe終被兒子的毅力打動，全力支持兒子追夢，更指「身為父親，一定會企喺佢後面」。

一脈相承

原來Joe年輕時曾是業餘的電競愛好者，坐著看爸爸打機是Daniel的童年回憶，「我細個成日坐喺阿爸大髀睇住佢玩，嗰時仲係bb仔。我記得佢成日同啲friend玩，佢地好專業，特登攞曬啲咪出黎，網上個未有Skype呢啲軟件，但佢哋自己網上有啲通訊系統就專係攞黎打機。」

當年Joe玩過的遊戲包括Rainbow Six、Command and Conquer等，甚至有過世界排名。週末不時會打通宵，連續十多小時不停打，導致耳水不平衡，便無奈放棄了這個興趣。

或許繼承了父親的電競癮，Daniel自小就喜愛網上遊戲，「我成日趁爸爸唔喺屋企靜雞雞打機。」他自爆自己小學二、三年級就開始接觸網上遊戲，連Joe也嚇了一跳。當時Joe的電腦設有密碼，Daniel會提早把功課做完、預留時間將密碼破解，才可以趁爸爸回家前爭取時間打機。

「先頭就唔知嘅，但係後尾發覺點解我電腦裡面啲嘢郁過嘅？咁我就估到就係佢破解到我密碼。」Daniel有張良計，Joe有過牆梯，後來換了又長又複雜的密碼，Daniel就無法再偷偷打機。

父子攻防戰

直到中三，Daniel初次接觸「電競」這個概念，「原來打機都可以變做職業，可以維生㗎喎，就開始諗住試下朝呢個方向發展。」當時他放學後會先到網吧打機，再算好時間比爸爸搭早一班巴士回家。「試過咁啱我遲咗返屋企，但撞正同阿爸搭同一班巴士，於是我就預早一個站落車，跟住就跑返屋企，我要跑得快過巴士。」

Daniel瞞著父親跑到網吧的事，早就瞞不過Joe的雙眼。「咁我都有偷偷跟過佢，想知個仔係度做緊乜嘢、群咩人。點解跟佢呢，就係有一日喺屋企見到一張網吧卡，咁我就喺度懷疑，佢啲零用錢咁快用曬嘅？好似越俾越多咁，於是有日偷偷地跟住佢去睇下囉。」Joe邊告訴記者跟蹤兒子的過程，Daniel在旁難掩驚訝的表情，如夢初醒，「完全唔知㗎，而家先知。」

為了追逐電競夢，Daniel無所不用其極，甚至與補習老師「合謀」逃課看電競比賽。當時有一個英雄聯盟世界賽總決賽的直播活動在九展舉行，Daniel的補習老師將他「放行」去看比賽，結果Joe發現之後非常生氣，一怒之下將補習老師解僱。Daniel一臉尷尬地笑著說，「不過嗰日其實都對我係一個好大嘅轉變，因為嗰日我去咗睇打機比賽，變咗認識到之後電競路上對我好有幫助嘅人，可以話間接導致我入咗行。」

電競夢的代價

Daniel很記得，當初父親未能理解他的目標，曾經說過「電競呀？你打機會做乞兒咖！」直到中五父子之間一場認真的對話，讓Joe明白兒子想以電競為職業的決心。「所以佢同我講佢好支持我打機，但係佢話如果你揀咗打機條路，你最好就打到最叻。」

當時父子間有個約定，「如果佢中五都仲係讀唔到嘅話，我就會同佢退學。佢都應承我，當時佢會抽多啲時間讀書，讀好佢嘅。」當初Daniel的父母費盡心思，從荃灣搬到灣仔，還四出找人寫信推薦，才讓Daniel入讀香港華仁。最終Daniel因為醉心電競，未能兼顧學業，留過兩年班後Joe終於決定幫他申請退學，讓他專心在電競方面拼搏。

雖然Joe的內心始終希望Daniel能夠重拾學業，但他從不會迫兒子接受自己的想法，只會從旁提醒和給予意見。「都同佢分析過，希望佢應承我一件樣嘢，就係每年自己evaluate自己，你自己個地步去到邊，就冇可能盲舂舂打，你都冇可能打一世。」年輕時也曾熱愛打機的Joe很清楚打機對身體的影響，知道電競選手的職業生涯有限，「我地有個agreement就係打到23歲，如果仲未出頭嘅話佢就要諗下第二條出路。」

兒子背後的父親

23歲的時限屆滿，Daniel坦言覺得自己「未係理想進度」，不過最近他對自己的電競路有新的想法：「以前就係成日想做選手、選手，但接觸耐咗發現唔係喎，有好多嘢可以做㗎喎其實。最近開始我比較有興趣嘅就係電競呢方面嘅教育。」

在電競的上走著走著，Daniel時而會回頭看，「其實係有諗過會想返返學校繼續讀書嘅，但係話會唔會後悔呢？又未去到話後悔咁嚴重。因為始終我都喺電競學識咗好多嘢，又識咗好多朋友，對我個人成長都好大幫助。」

現在的他找到了電競路上的新方向，一心只想堅持下去，「我好細個就認定咗我係想做電競，我都覺得我難得堅持咗咁耐就試下繼續做落去囉。」

Joe看見眼前的兒子依舊目標清晰，也沒有再勸說兒子繼續學業，只想寄語兒子：「佢而家讀緊社會大學，希望佢喺個度學下真係珍惜，學下點樣去做人。我就幾時都會喺佢後面嘅，身為父親，一定會企喺佢後面。」

撰文：官琳

拍攝：梁正平、于港民

9月2日起升級條件將更新 繼續每月撐壹仔 講真心話撐住我香港！