當年今日

  馬年上流社會多喜事 - 李八方

蘋果日報 2002/04/05 00:00


大新銀行老闆王守業娶新抱,今個禮拜六遠赴日本補擺喜酒。呢宗豪門婚宴,雖然主人家低調,但城內班上海幫大多去飲,亦趁機去賞吓櫻花,煲呔曾雖然並非上海人,一樣飛過去恭喜王老闆。聽班大粒佬話:「請得到冇法子推嘅」。除咗王家婚宴外,馮國經禮拜日亦訂咗場,請食晏。
可能因為婚宴在東京舉行,有人誤以為新娘係日本人。其實新娘子叫許明茵,洋名Stephanie,在一間美資大經紀行任職;許爸爸係退休公務員,以前負責指揮飛機升降。新郎叫Harold王祖興,大新搞虛擬銀行豐明時,都經常見報。一對新人早在今年一月四號註冊。
呢個婚宴玩足兩日,咁多猛人,肯定好熱鬧,詳情下個禮拜再八畀各位知。
除咗財經界之外,最近政圈亦喜事多籮籮,呢邊廂有梁伏戀,又有劉皇發同田北俊嫁女;今年七月,就到黃宏發等新抱過門,皆因佢個仔待未來老婆七月畢業後,就立即結婚,咁佢就榮升老爺嘞。但係發叔個仔會同老婆喺美國一個埠仔行禮。發叔話,費事喺香港搞,免得請得一個,又唔請第二個。
講起戀情,居港權單嘢咁難擺平,唔知梁伏戀會唔會有啲契機?吳靄儀噚日同八方講,以往政府官員對爭取居港權人士嘅嘴臉,係認為佢哋喺結婚時,一早預咗婚後要家庭分離,所以唔可以用家庭團聚求情。吳靄儀話,梁伏戀若開花結果,希望大家可以用另一種態度睇家庭團聚。


E-mail:[email protected]