近日接連有騎師被罰停賽，賽後報告喺公佈罰則之餘，亦會交代競賽小組衡量罰則時，考慮咗騎師有良好策騎紀錄。好多馬迷都唔明，好似田泰安同莫雷拉等騎師，今季被罰停賽都有前科，點解小組重會話佢哋有良好策騎紀錄？究竟點樣罰騎師，係咪有賽例規定罰則，抑或係首席受薪董事祁禮謙隨個人喜好決定？

今季最明顯例子，唔使問都係田泰安騎「五十五十」，田泰安竟然連續騎三次都出事，加埋罰咗七日同四萬蚊。若對比三次罰則，第一次罰停賽兩日兼罰錢，第二次罰停賽三日，最近呢次第三度犯規竟然只罰兩日。唔明嘅係，頭兩次犯規罰得仲甘，第三次犯規，反而罰得最輕。

啱啱上次夜馬，又到莫雷拉騎「進綵」犯規，被罰停賽兩日，競賽小組又再話雷神策騎紀錄良好。咁季初雷神騎「自動波」末段垂手被罰，策騎紀錄應該有底，唔通咁都算策騎紀錄良好？抑或雷神係冠軍騎師就特別巴閉，犯規都可以酌情減刑？

過去巫斯義、羅理雅同莫雷拉，都試過因為犯規被競賽小組罰錢罰到牙痛咁聲。記得馬會冇耐前先大費周章訂立規例，講明騎師累積停賽次數越多，相對罰錢代替停賽嘅金額就越高，既然有晒規例，犯規越多就罰得越甘，揸正嚟做的話，田泰安最近騎「五十五十」，真係冇理由唔使罰錢。

家陣競賽小組畀人嘅感覺，變嘅完全冇跟規例做嘢，好似鍾意點罰就點罰，對唔同騎師有唔同罰則，罰多罰少亦次次唔同。小組鍾意嘅騎師，更可以特別召開睇片會幫佢解畫，或者自圓其說話佢嘅策騎紀錄良好，咁樣對其他騎師，真係非常唔公平。

阿Joe