十年，對薛凱琪 (Fiona) 而言，不僅是大了十歲這麼簡單，還是音樂人黃偉文為她度身訂做的三部曲歌詞，蘊含她多年前後對自己的寄語。走出抑鬱低谷，2016年縱然仍是單身，不過是她認為最開心的一年，終於學懂放下，不再怪獸，體會到快樂真諦：「不要跌入做大人嘅圈套。」

統籌：林妙萍
撰文：林嘉慈
攝影：郭賢興　　
攝錄：林德雄、李祉澄　　
剪接：李祉澄
化妝：Jessica Chan of Jessica Chan Makeup Workshop
髮型：Jo Lam of Queen's Private i

2006年，Fiona擔心做大人、入行後會不快樂，憂慮不能令自己無悔、令家人驕傲，黃偉文 (Wyman) 送她一首《給十年後的我》歌詞，隔空問將來的自己：「快樂嗎？你忘掉理想，只能忙於生活嗎？」兩年前，還處於迷惘的Fiona於個唱中收到對方送上《給十年前的我》作回應。

我係唔要玩伴！

第三部曲《十年後的我》最近誕生，提醒她「別到無牙先張牙」，完全沒有提及愛情狀況，反映Fiona感情空白，「唔知點解由細到大都係一個好有耐性嘅人，試過等四年半，最少都等一年至年半，因為我要嘅係愛情，唔係玩伴。」
即使遭身邊人質疑太有耐性，她依然故我，「通常唱片公司唔想藝人拍拖，後尾佢哋反而挑剔我唔拍拖：『要等要睇，成個探測器咁，好嘅嘢都俾你等到悶晒，可能佢可以追十個女仔喇！』

我係怪獸仔女？

「我就回應：『如果我係要安全感，佢等唔到嘅，唔好話佢衰，我肯定佢唔係注定嗰個。』搞掂咗自己個思維，愛情路上就會快樂。」這十年來，Fiona落力調整自己，家人最能感受她的轉變，「當你大個咗，你會覺得爹哋媽咪係小朋友，我哋學嘢個年代唔同，成日想餵佢多啲information，好似我細個時佢哋咁樣，但返嚟有少少反效果。」
多得讀哲學的朋友點醒，不要只執意改變別人，「當我開始體諒父母，原來佢係某一個年代、年紀，學嘅嘢要喺番佢自己個pace，我開始變，佢哋都變。」慢慢搣甩怪獸仔女性格，「就算入咗呢行，見好多嘢又信主，睇好多書，個人好spiritual，好似好smart，但要成日remind自己唔係最好，要謙虛，先可以冇咁怪獸。」

我係智慧小孩！

由軟弱過慮的初版Fiona，走到睇通複雜灰暗世界的迷失期，進化至今日最強的10.0新版，「選擇做一個有智慧嘅小朋友，今年嘅我算係最快樂、最有智慧，希望出年再進步。」唯一不變就是孩子心，「做人莫過於笑得、食得、瞓得，快樂嘅人就係最聰明，千祈唔好進步到好計算。尤其是我信主，冇嘢好害怕，因為佢永遠畀最好嘅嘢你，有唔好嘅遭遇係佢畀緊智慧你。」

心境決定外貌

女星多少都牽涉入整容傳聞中，Fiona也不例外，還曾被網友指似鄭裕玲。Fiona坦言樣貌必然隨年紀改變，「睇番6年前啲相都差好遠。」認為最吸引的女人是擁有懂照顧人的成熟、低能搞笑與害羞的少女特質，豁達面對變老的自然定律：「荷爾蒙好緊要，相信只要開心就會靚。」當然花心思去保養亦是職責所在，絕不偷懶，「喺屋企搵張瑜伽墊做帶氧運動，不斷做45分鐘，我瘦唔易出汗，有時仲着風褸、襪，出汗去排毒、去水腫。」

更多精采時尚內容，盡在 http://add.appledaily.com 。