隨着嘉玲同偉仔高調拍拖去印度見大寶法王，被傳同嘉玲都係一對嘅鴻海精密創辦人郭台銘，亦終於由娛樂版回歸到財經新聞版，而且仲要係極有江湖地位嘅《華爾街日報》！
五年嚟首次接受西報專訪，文章嘅標題係「郭台銘的紫禁城」，除咗佢嘅感情生活，個訪問咩都講啲，其中一個point係佢搵緊接班人！唔知係咪因為咁，佢間鴻海hold住嘅富士康（2038），股價噚日即插4%，市值一日唔見咗63億元，睇怕佢有排唔使旨意唔do！
華爾街個記者話，呢個訪問佢約咗5年（5年！？），做咗三粒鐘，郭總除咗講到自己討厭「出名」，又話諗住捐出身家嘅三分一出嚟做慈善，𠵱家佢正響公司裏面搵緊有潛質嘅接班人。

點解有退落嚟呢個想法？佢話係參考清朝亁隆皇帝呢個案例──由1736年做到1796年，84歲先收檔，冇錯上半part係將清朝發揚光大，但後期年紀大好多判斷/決定都係錯，總之在位60年太長（其實仲有三年做太上皇，因為唔想做皇帝長過佢爺爺康熙，所以60年就退位），所以佢話趁住自己仲後生（五張六！），畀啲機會後生仔上囉！
個記者又問，觀察到郭總管理鴻海好似軍隊，佢嘅個人魅力激發到下屬嘅效忠，而郭總就話，佢心儀嘅英雄係13世紀嘅征服者成吉思汗！𠵱家佢手上戴住嘅珠串，就係響一間供奉大汗嘅廟度得嚟……唔怪之得郭總響班女星之中，成個007crossover大俠咁款啦！
[email protected]