港視《來生不做香港人》自播出以嚟，由於話題夠爆，如鬧香港餐廳用殘體字、香港人買東江水嘅價格問題等，旋即吸引網民追睇，當中演女強人Anson姐嘅張可頤喺劇中感情崎嶇，更加令觀眾我見猶憐，今日有周刊爆可頤現實中亦都dry足三年，都好想搵一個「stable」啲嘅男友。

據報道指，Anson姐張可頤2008年同金融才俊曾安邦拍拖，當時傳過佢哋訂婚，不過2011年可頤主動提出分手，掟煲3年後，張可頤感情一直未有著落，原來都有諗過喺內地搵自己嘅另一半，上個禮拜日被周刊問及感情狀況，可頤就話因為最近去上海拍咗3個月戲，對當地印象都幾好，唔排除會同內地男發展，覺得自己成日要四圍飛，要搵個stable嘅男友唔係咁易，亦都冇把握可以維持。

話晒劇中Anson姐因為鬧爆香港餐廳用殘體字一幕，批評「香港都係用正體中文嘅地方，請尊重港人」，令網民拍爛手掌，依家真實嘅「Anson姐」話有可能同內地人發展，反差咁大，觀眾又接唔接受到呢?不過有時唔係「戲如人生」嘅，可頤喺情場飄泊咗咁耐，大家都想佢有個好歸屬!

不過周刊指，雖然可頤聲稱自己冇拖拍，上個禮拜五就被影到有個四眼男喺張可頤屋企過夜，第二日由可頤揸車載佢返家，之後四眼男又拖住一個中年女人去行街，該刊記者上前追問四眼男係唔係同可頤拍拖，四眼男當時就係講「冇呀」，張可頤亦指對方冇過夜，仲話大家遲啲就會知。

可頤又喺報道表示，自己好好彩可以拍到《來生不做香港人》這個好劇本，認為編織鮑偉聰等，好似洞悉先機，仲認為Anson姐呢個角色係佢演咗咁耐，呢個timing播出街係最有意思。