韓劇《下女誘罪》女星金敏喜去年被爆戀上人夫導演洪尚秀，洪尚秀更為金敏喜跟妻子申請離婚，雖然韓國民眾唔睇好呢段不倫戀，不過二人依舊愛情至上，近日金敏喜就孖洪尚秀現身康城。日前二人現身康城為《Claire’s Camera》行紅地毯時，金敏喜跟洪尚秀就刻意玩避忌，合照時金敏喜就黐實法國殿堂女星伊莎貝荷拔（Isabelle Huppert），不過今日二人為洪尚秀執導嘅《The Day After》行紅地毯時，金敏喜跟洪尚秀就再次拖到實現身，大晒恩愛。

金敏喜跟洪尚秀於當地時間22日下午出席《The Day After》嘅發佈會，二人今次就拖到實行紅地毯。雖然今次都係一眾演員、導演一班人手拖手行紅地毯，不過鏡頭後，金敏喜跟洪尚秀都依舊係時時刻刻拖到實，非常恩愛。

於發佈會上，洪尚秀率先示愛放閃，表示：「我喺韓國嘅記者會上已經講過，金敏喜係我嘅愛人，我愛呢個女人，金敏喜給予我好多靈感，跟金敏喜合作有好特別嘅意義。」

金敏喜亦表示：「我每次拍洪尚秀導演嘅電影都好享受，我好尊重佢，佢係個好有才華嘅導演，希望以後能繼續跟佢合作。」