當年今日
關於我們

【李八方online】PK鄧無視《警訊》 批《頭條新聞》從沒譴責暴徒

蘋果日報 2020/03/04 14:12

王喜頭條新聞警訊鄧炳強驚方信息

市民覺得香港警察係特權階級真係不無道理,睇吓警務處處長鄧炳強尋日畀港台封信就知。自言睇成龍電影學做警察嘅PK鄧,尋日又就港台節目《頭條新聞》寫信畀港台,鬧《頭條新聞》從來無譴責過暴徒、批評過暴徒。乜成龍喺《警察故事》入面成日寫信畀其他部門咩?係咪刪剪咗呀?
PK鄧封信都係一貫嘅套路,先話警方「尊重言論自由及編輯自主」,亦欣賞港台用輕鬆手法畀大眾容易明白不同社會議論,但係真正想講係批評《頭條新聞》「從來沒有譴責或批評過有暴徒破壞商舖、四處堵路、縱火、嚴重傷人等暴行,亦從來沒有譴責或批評過支持暴徒的人」,亦都冇提及社會上好多人對暴徒嘅暴行非常反感。淨係呢一段經已自相矛盾。
跟住PK繼續針對由王喜飾演嘅「忠勇毅」所主持嘅「驚方信息」,話「驚方信息」描述11宗去年6月中至今年1月底、被列為無可疑嘅有人死亡案件,講到好似警方調查唔認真、唔專業咁樣。最後就話「驚方信息」會令觀眾對警隊產生錯誤睇法,誤解警隊,所以去埋信畀通訊事務管理局投訴。港台發言人話,已收到有關信件,會按既定投訴機制處理。
其實呢啲做法同自己拉唔到客,就怪其他人搶自己客一樣咁低莊,警方咁有本事咪喺自己地頭《警訊》嗰度集集譴責暴徒咯。順便話聲畀警方知,咁多個紀律部隊,得警察有自己節目《警訊》,而且《警訊》由1973年開始就有,足足比《頭條新聞》早咗16年。
-----------------------------
【未敢忘記】03年沙士重溫
立即按此
-----------------------------
無懼警暴 學懂自救
《抗暴之戰●法例須知》讀果 上架
-----------------------------
《果GYM》隨身播  健身壹App過!