球季開了，難得喺呢段國際賽賽期，有機會唞吓氣，其實聽友人建議到澳門唞一兩天，吃喝玩樂係一個唔錯嘅選擇；咁啱見到一個澳門五星級酒店嘅廣告，佢哋趁9月開始踏入淡季減房租，真係心都郁埋，不過至怕去到賭場定力唔夠……
執筆時，今夏球員轉會市場尚未關閉，但當大家話因滙價貶值同稅重，英超球會出唔起錢請人；但係好似老樸同熱刺仲好似癲咗咁掃貨，最癡線梗係侯城中堅米高端納值1,200萬鎊（約1.5億港元）賣畀新特蘭，阿仙奴簽華美倫用1,000萬鎊，有米嘅巴塞剛簽嗰位薩克達中堅都係2,000萬鎊左右，一個英國二線當打中堅真係值咁貴？新特蘭領隊布魯士單計季前買賣，已淨花了二千幾萬鎊，呢種賭性，同去賭場博鋪大細冇分別。留到級，盈利都係翻一翻，當然搞波可以係笑蝕嘅玩意，我哋本地班霸南華就係最佳例子。