當年今日
關於我們

【投行秘聞】WFH、巴郡和I kill you later(遮打道口水佬)

蘋果日報 2020/07/07 18:00

遮打道口水佬

近期投資界紛紛在討論畢非特在武肺疫情下,在其巴郡投資組合內未能作出合時的決定。尤其是在他減持其美資航空股時,正是如投資初哥buy high sell low一樣,低位沽貨,無晒飛屎。有人開始質疑畢非特年事已高(今個8月就做90後),他是否還能作出適時的投資決定?

每次看到關於巴郡Berkshire Hathaway的新聞我都會諗起WFH(Work From Home)和Accumulators(香港人叫I kill you later)。三件事好像風馬牛不相及,何解會諗埋一齊?

由於呢個係一個美好回憶,再加上成個order最近已經完成,我就同大家分享吓。事源十幾年前,有個「飛來蜢」,mid-forties,HKU,然後哈佛MBA,不過係醒嗰隻,好慳家,踏實不多言笑。捱咗十年美資律師行通宵達旦的IPO生涯後,賺咗嚿錢想投資。

「好難頂呀!好多問題,答完又再嚟過。GK,麻煩你同我去見吓佢。」Kate好煩躁地說。Kate當時還是好junior,呢啲「飛來蜢」嘅細嘢最好搵佢哋去學吓嘢,唔掂嘅時候先幫手。

「飛來蜢」確實係問題兒童,但佢勝在有心學和屬於行動類型,唔會嘥大家時間。佢話有3個仔女,嚟緊再多一個(我差啲想問生夠未?!)。有$5球美金想投資,唔介意畀15-20年時間,目標係,在佢差唔多退休時,$5球最後會增長到$20球,仔女最後每人分到$5球。傾咗好耐,全世界都問過晒,但佢問得最多嘅就係畢非特。

「你其實係咪好想投資Berkshire Hathaway?」我直截了當地問。佢卒之承認「係」,但唔知用咩嘢最佳方法。於是我話我哋番去assess下佢嘅risk profile,如果OK就會畀個proposal佢,當時係2002年第四季。

說時遲那時快,香港跟住就爆發非典肺炎,公司trigger contingency plan,展開了第一代嘅WFH(Work From Home)旅程。在WFH時,正正係幫「飛來蜢」execute個巴郡investment plan嘅時候。個plan其實好簡單,一共分三個strategies,其中一個strategy就係用accumulator。

香港投資界和監管機構對accumulator其實一知半解。一係就驚過龍missed the boat,一係就勇得滯,食粒糖輸間廠,最後驚到要就叫佢做I kill you later。其實accumulator只係個acquisition策略,無話好定唔好,最緊要用得適宜,其中最適宜用就係去吸納一隻想長揸嘅股票,但唔係盲舂舂咁去做,而係睇位當隻股票在range trade嘅時候用。

雖然$5球美金order唔係大,但係勝在當時係沙士,又WFH,又巴郡,係一個好型嘅plan,於是我都樂見其成。

成個plan卒之在平均價6萬8千美元左右吸納巴郡。17年過後,巴郡股價最高去到$350,000一股,計埋條數每人已經多過$5球,可以埋單收水。可惜武肺襲美,嚟得太快走唔切,但唔緊要,只要原定目標已達到,可算是大功告成。於是和「飛來蜢」同意下,成個盤就在$275,000平倉,任務完成,皆大歡喜。

人在市場,對咩嘢都唔可以一生一世,最緊要有discipline,目標已達就唔好再回頭。就算係熱戀了17年,也會有分手的一天。

遮打道口水佬

investMAN
For People of Style & Substance
掌握理財智慧 感受生活品味
http://investMAN.hk