藝人吳彥祖（Daniel）喺美國加州長大，一直都係勇士死忠球迷，即使做嘢有幾忙都好，佢都會盡量抽時間睇波支持愛隊；Daniel近日就喺ig大爆自己會飛到金州，去到甲骨文球場睇總決賽Game 5。

Daniel話今季NBA總決賽期間，自己不時都會喺奇怪嘅地方睇波：「我喺Game 4下半場身處中環，要坐喺車入面睇波。順帶一提，我當時唔係揸緊車㗎。我要向騎士致敬，因為佢哋上半場表現得好瘋狂，不過勇士會喺主場奪冠！我下一場睇波嘅地點，會喺甲骨文球場，我已經買好波飛喇。」