當年今日

全球暖化還是冷化 - 左丁山

蘋果日報 2006/09/04 00:00


八月三十日,加州參議院通過法案,要求加州嘅大型企業如煉油廠、發電廠、煤氣、水泥廠等逐步減少排放,在二○二○年前減少排放百分之二十五溫室氣體。州長阿諾舒華辛力加雖然係共和黨人,但為咗競選連任,爭取州內環保人士、自由派人士嘅選票,唔理得商界反對、共和黨壓力,一於與民主黨合流,推動減排污案,以示先進,為減少全球暖化貢獻。
八月二十五日,外電報道,俄羅斯科學院天文學觀察所發表談話,指目前地球面對之危機唔係全球暖化(globalwarming),而係全球冷化(globalcooling),佢哋關於太陽排放(solaremission)嘅研究發現,目前地球氣溫已經達到最高度,好快就會轉向,全球氣溫逐步下跌,環球冷化會由二○一二至二○一五年間開始,到咗二○五五至二○六○年,荷蘭可能歷史重演(十七世紀末,荷蘭運河結冰)。俄羅斯科學家話,即使唔實施「京都協定書」,地球氣溫都會下降!
信邊個?
全球暖化派無論在人數、聲勢、研究金額以及傳播宣傳,都大大壓倒全球冷化派。不過俄羅斯科學院唔係阿貓阿狗科學院噃,俄國科學天才甚多,俄羅斯科學院久享盛名,佢哋嘅天文學科學家會唔會噏得出就噏呀?
九月一日,印度時報(TimesofIndia)有一篇特稿,指暖化派每年擁有多以十億美元計嘅研究經費,宣傳極之成功,在傳媒出現的公眾人物唔講全球暖化,唔講減少排放,就係政治不正確。特稿作者睇過一幅「綠色和平」照片,顯示阿根廷南部之冰川面積日漸縮細,證明暖化威脅海洋生態。作者對此印象甚深,去年聖誕節,特別去LakeArgentina放假,實地見到唔少冰川自安廸山脈滑落阿根廷湖,一啲原來嘅冰川縮細,一啲新冰川不斷擴張,作者因此認為「綠色和平」,以偏概全,冇誠實地報道全部事實。所以,信邊個呢?暖化派已成利益團體,冷化派被主流科學家恥笑。左丁山仍然持懷疑態度,唔信冷氣Keep住二十五點五度就係環保。