【晒泳照是常識吧】社交網放閃 張曦雯:只係普通相
演唱會蔡一智林敏驄張曦雯塌台
林敏驄今日去到九龍塘擔任新車記招嘉賓,大會邀請張曦雯擔任司儀,面對阿驄把口,張曦雯都已經戰戰兢兢,介紹新車附設USB功能時,阿驄笑住講:「得閒俾人插,一坐上去就俾人插。」張曦雯即指係插嚟叉電,現場同模特兒玩遊戲時,阿驄再指車夠大可以震,張曦雯就話唔幫佢翻譯。事後阿驄話唔翻譯唔要緊,因為模特兒已抄佢牌,佢又讚張曦雯口技好有急才。
之前阿驄喺紅館舉行入行35周年作品展演唱會,草蜢成員蔡一智因此而受傷( 新聞連結: http://bit.ly/2rQgq3a ),問佢有冇問候蔡一智?佢話:「我有WhatsApp佢,仲同佢講我都散散哋,完騷後都要唞番一個禮拜。」阿驄話留醫嘅舞蹈員已出院,待休息後要好好同佢哋食番餐,兼將來再合作,佢承認有意開part 2,同時鄭中基、李思捷等分別邀請佢開騷,所以睇紅館批邊單先。如果再開part 2,當然會再邀請譚詠麟,原本阿倫答應8號加場來唱,幸好冇加,若果加場可能變成早一日開騷前塌台,但佢覺得一切係天意。
對於阿驄突然爆肚,張曦雯話事前已好緊張,擔心自己招架不住,諗住一係以儍笑應對,幸好都冇被耍,今朝上載泳衣相引起網友留言,佢指只係普通相,沒想過反應咁大,不過佢未諗過出寫真。
張曦雯今日出席汽車活動,笑指喺社交網上載性感泳照只係普通相啫。(ig圖片)