網媒香港01喺星期六區議會選舉投票日前，刊登咗兩篇題為《什麼人不符合出任區議員應有的品格和德行》同《政治素人空降區選 讓他們鍛煉多四年》嘅評論文章，入面仲點名一啲建制同民主派候選人唔適合做區議員，但就以民主派為主，好似許智峯、梁國雄、袁嘉蔚，但文入面完全冇提出理據，結果引嚟網民大鬧香港01想干預選情，擺明屈民主派，又話香港01每到關鍵時刻就會露出「紅媒」真身，估唔到連香港01編採人員都割席，話篇文唔代表佢哋。

自己友採訪遇襲冇譴責

一班香港01編採人員噚日實名聯署聲明，同呢兩篇文割席，話公眾對兩篇文章有極大批評，而兩篇文其實由評論編輯室撰寫，唔代表佢哋立場，亦不反映佢哋意見，又話兩篇文未提供充份事實論證下，點名唔支持多名候選人，有關評論有欠公允，仲有失專業，而且仲可能違反《區議會選舉指引》同《選舉（舞弊及非法行為）條例》，佢哋對香港01係選舉前夕發表可能影響選舉公平公正評論文章，感遺憾同強烈不同意。

封聲明又話，香港01前線記者採訪時屢次遭不同政見人士襲擊，不過公司冇譴責粗暴對待同事嘅人。爭議文章發表後，同事往往喺採訪嗰陣被敵意對待，客觀效果係「社論促使社會撕裂，同事先輸」。好多網民都支持香港01記者割席表態，唔知作為老闆嘅于品海，幾時肯出嚟交代吓？

李八方