上月28歲大馬女神林明禎被爆新戀情、同25歲台灣男演員張軒睿撻著、喺5月20號相約茶館甜蜜約會，報道一出，張軒睿馬上認愛，喺fb貼出同明禎肩並肩嘅背影照坐，兩人坐喺山丘上睇風景，留言：「I'll always be here for you （我會永遠在你身邊）。」明禎嘅經理人亦未有否認兩人拍拖：「公司這邊的回應跟過去一樣，對明禎沒有禁愛令。」點知，認愛差啲一個月，明禎分手了。（新聞連結：　 https://bit.ly/2kd68FH　）

台灣傳媒今日報道，明禎同張軒睿已經分手，主因係女方認為對方「沒Guts」、疑似出軌、爆出戀情後馬上飛往上海，逃離是非。張軒睿經理人低調承認雙方分手：「這就是他們的私事，不多回應。」又稱：「軒睿對這段感情有很大誠意。」

報道指，張軒睿同明禎一齊嘅時候，其實仲未同模特兒女友Shiny分手。報道指張軒睿為咗令明禎安心，於是搵傳媒偷拍兩人約會，再於fb火速認愛。但認完愛之後，男方急飛往上海，被「解讀」成「避風頭」，由得明禎一人獨自面對傳媒，搞到好似「女生倒貼」咁，兩人暗生嫌隙。

傳聞仲有另一個完全相反嘅版本，就係張軒睿怪責明禎周圍放料，令兩人戀情曝光。明禎嬲張軒睿認為對方冇Guts，屢爆爭吵，最後分手收場。

家陣張軒睿喺宜蘭開工，佢嘅經理人冇你好氣咁話：「本來就是工作安排，沒有逃走這種事。」至於傳媒報道指張軒睿劈腿，其經理人否認：「他沒有劈腿。」

張軒睿同明禎因合作拍電視劇《狼王子》而認識，上年男方為明禎新歌MV《不是不愛》當男主角，開始建立起交情。上月22號佛誕認愛，端午節前後分手。

精選娛聞，喺晒《娛果》
http://fb.com/appledailyent