閱讀着這篇文章的陌生人，你好！
我正在做一個計劃——每日迫自己搵一位陌生人傾偈。
今天在巴士上層，遇上了我最害怕的陌生人。
坐在我旁邊的，不是甚麼紋身大漢，而是……
一位年輕女生。

每次遇到年輕女生，我都會異常緊張、心跳加速、難以開口。
她看了一會電話，然後把電話收了起來，靜靜地坐着。
機會來了～陌生人！
我鼓氣勇氣，把頭部轉向九十度，望向了她！

然後，頭部在零點零一秒內轉回原位。

或許，這篇專欄的題目應改為「不敢正視她的害羞男生」。

我猶豫了很久很久，大約有十五分鐘，車程也過了一半，終於鼓起勇氣跟她開口：「Hello……」
她錯愕地望了過來一眼，然後零點零一內望回前方。
「我做緊一個計劃，係每日都會搵一位陌生人傾偈，我唔係Sales、唔係傳教，同埋我有女朋友㗎喇，我可唔可以同你傾一陣偈？」
她完全不敢望向我，顯得十分緊張。

為了減低她的擔憂，我拿出電話，打開「陌樂偈」的Facebook Page給她看，證明我真的在做這個計劃。
她依然不敢望向我，甚至沒有望過我的電話。

我收起電話問她：「唔好意思，我係咪阻住你？」
她繼續望着前方，輕輕地搖一搖頭。
「你讀緊書定做緊嘢？」
「讀書。」她終於開口了。
要減低陌生人的緊張感，最好的辦法就是直接問關於他的事情，萬試萬靈。

「你讀咩科？」
「翻譯。」

「點解會揀讀翻譯嘅？」
「讀中學嗰陣，發現自己好鍾意翻譯啲英文。」
「你讀呢科係咪要學好多語言？」
「唔使學好多，學三種就夠，中英一定要學，自己再揀多一種。」
「咁你揀咗……」
「西班牙文。」

「我覺得西班牙文好型，不過我剩係聽過巴斯光年講西班牙文。」
「哈哈，我本身都係。」
「就係因為咁，所以你揀西班牙文？」
「唔係，因為佢係第三多人用嘅語言。」
（頭兩位就是中文和英文）

「咁你啲同學多數都係揀西班牙文？」
「唔係，好少人揀，多數揀韓文，因為鍾意睇韓劇。」
「係咪女仔多？」
「唔係呀，男仔都揀韓文。」
「日文呢？」
「冇人揀。」

想學一種外語，最有效的方法，就是先愛上那個國家的影視節目。大約十年前，日劇很流行的時候，很多人也去了學日文。在新一代的心目中，日劇的地位已經被韓劇取代了！

「咁你鍾唔鍾意睇韓劇？」
「唔鍾意，我覺得啲劇情好無稽，綜藝節目就幾好睇。」
「咁你有冇諗過揀韓文學？ 」
「我本身已經識韓文。」
「點解嘅？」
「因為我家姐鍾意睇韓國啲綜藝節目，我溫緊書嗰陣間唔中會望下，聽得多就學識咗，而家唔使睇字幕都聽得明，去韓國旅行都可以同當地人溝通到。」

我聽得目瞪口呆……
「咁犀利？聽聽下就學識？」
「其實唔難，韓文嚟嚟去去都係嗰啲音，你都可以試下。」
「我冇可能做到，我諗你係骨格精奇，萬一無中，好有語言天分先做到。」
「唔係呀～真係好易㗎咋，你試下啦～聽聽下就識。」

這個時候，她對我的抗拒值已經跌到零，就像跟朋友一樣傾偈。
可是，她依然一直沒有望向過我。

「咁你畢咗業係咪想做翻譯呀？」
「係呀。」
「恭喜你搵到自己鍾意做、又有天分嘅嘢。」

要一條魚去踢波，牠就是白痴，但叫牠去游泳，牠就是天才。
發掘自己擅長做的事，真的非常重要。
如果未找到自己擅長的事呢？那就去做自己喜歡的事吧！
當你熱愛那件事情，就自然會令自己變得擅長。

「你之前有冇試過同陌生人傾偈？」
「冇。」
「同我傾完偈，你覺得點？」
「OK啦，幾好，好似同朋友傾偈咁。」
「咁我初初同你講嘢嗰陣呢？」
「嗰陣我諗緊，你係咪偷拍緊我……以為係網上成日見到嗰啲整蠱節目，或者係啲唔知咩實驗……」
「哈哈～唔怪得你咁緊張！」

「之後你拎個電話出嚟，我早排睇新聞話有人會專登整跌個電話，之後扮畀人撞跌然後屈人啲錢，所以我好驚⋯⋯」
「哈哈哈，嚇親你唔好意思～咁你嗰陣諗緊咩？」
「諗緊點算好⋯⋯之後你收返埋電話，傾傾下就知道唔係。」

「可唔可以問下你，點解你一直都望住前面嘅？」

「因為⋯⋯


我食咗榴槤班戟⋯⋯」


原來如此！真相大白了！

說完後，她尷尬得掩起了臉。

為免令她更尷尬，我馬上轉移話題：
「你有冇嘢想問我？想唔想知我係做邊行嘅？」
「你咪講咗囉～你搞嗰個Page吖嘛～」
「哈哈～你覺得我嘅工作就係搞個Page？」
「唔係咩？」
「我搞嗰個Page冇錢賺嘅⋯⋯」

「咁你做咩㗎？」
「我做演員嘅⋯⋯」
「唔好偷拍我呀！」她馬上用雙手掩起了臉。
「唔使緊張，你放低手先啦⋯⋯」
她慢慢打開了雙手。
我隨便指向前方說：「個鏡頭喺前面呀～」
「唔好呀～」她再次掩起臉。

「講笑咋～真係冇偷拍，但係我會將我嘅經歷用文字紀錄低，然後放上網，你唔介意吖嘛？」
「唔介意，最緊要你唔好偷怕我就得喇！」
「真係冇呀！我落車喇～多謝你同我傾偈，有緣再見！」
「Bye Bye～」

我們都是陌路人，就這樣傾了一場「榴槤」忘返的陌樂偈。

專欄作者簡介：
陌樂偈
每天跟一位不同身分、年齡、職業、性格的人傾偈，
能夠鍛練膽量、增廣見聞、建立自信、提升溝通技巧。
別再被手提電話俘虜，從互聯網回到現實世界吧！

Facebook專頁：
https://www.facebook.com/ChatToStranger/