港股悶爆，高開200點後升幅逐漸收窄，埋單僅升47點，成交更創3個月低。買賣兩閒，大家等緊乜？近嘅有今日出籠嘅中國第三季GDP，以及下晝學聯同政府會面嘅結果，遠嘅有本月底儲局議息結果，以及下月初舉行嘅APEC會議，23000大關相信係恒指短線嘅勢力範圍。
悶市下國策股有起動迹象，港口股有資金追捧，天津港（3382）破旗彈高半成，配合最新國策，升勢料有餘未盡。
天津港主要從事集裝箱、散雜貨裝卸業務、銷售業務及港口配套服務，截至今年6月底止半年，營業額按年升42%至141億銀，盈利微跌5.4%至4億銀。國務院月初正式批准天津港口岸新一輪擴大對外開放計劃，新增對外開放水域1,120平方公里，新增碼頭岸線69.1公里，新建對外開放碼頭泊位71個，天津港作為區內主要營運商，完全食正條水，盈利爆升只係時間問題。