港大係百年老店，長期服務員工寧舍多，噚日向234名做咗成十幾年至四十幾年嘅非教職員工頒發長期服務獎「老人牌」，當中喺港大做咗36年嘅丁偉明，71年中五畢業就入咗港大醫學院做解剖學系實驗室助理，𠵱家係實驗室主管。
原來佢爸爸都係解剖實驗室主管，由於自細就去爸爸工作地方蒲，耳濡目染下唔驚遺體，所以子承父業一做三十幾年，佢邊做邊學參加各種專業試，係第一個將屍體塑化技術引入香港嘅人。
人稱「丁仔」嘅佢見慣死屍，有時仲會充當教授助手指點學生解剖人體，過去幾十年見盡唔少醫學院新生首次劏屍驚青場面，可以話當今名醫都係佢「門生」，衞生署署長林秉恩都跟過佢學劏屍。「丁仔」成世人都同劏屍有關，連追女仔都唔例外，佢太太當年入呢行時跟佢學師，停屍間竟然長出愛苗，兩公婆由解剖室走入教堂，而且係全港僅有嘅英國註冊防腐師。