太陽底下無奇不有，8號仔電訊盈科（008）噚日出中期報告，其中「一般資料」一欄中披露，主席李澤楷「按照艾維朗（即係董事總經理AlexArena，簡稱AA）的要求並基於私人理由」，私人借咗筆1000萬美金（大約7800萬港銀）嘅7年期免息貸款畀AA，而AA就同小小超一間私人公司簽咗一份7年期顧問協議，電盈話呢7年嘅顧問費足以抵償嗰千萬美金貸款。咁睇嚟份顧問協議十足十賣身契，作為「肉償」囉。

留多7年肉償

咁AA點解要搵老闆小小超搞呢單易借兼夾唔使點還嘅「幫民貸款」？8號仔內部刊物「盈訊」9月號「咁蹺」訪問咗AA，根據佢解釋，自己年近花甲，今年初同主席磋商退休問題，結果係，如果佢能夠留多一陣，對集團同公司都有利，「實在令人欣慰」（佢自己話咋）。就係咁，佢同主席簽咗呢份猶如「最惠國待遇」嘅安排協議。
AA又話，呢個安排雖然唔涉及公司資金，但佢哋仍然決定自願披露，以配合8號仔嘅高水平企業管治要求。據消息人士話，有人要「度水」嘅真正原因，係要籌錢搞離婚。咁做乜離婚離到咁貴呢？相信只有佢一個人知。

李華華
mailto:[email protected]