澳洲籍練馬師大摩、賀賢這天相繼開齋後,第八場二班草地千二米,輪到另一澳洲籍倉主蔡約翰贏2.2倍大熱win開糊,麾下新星「華恩庭」操好配雷神孭輕磅出擊留前鬥後,結果半條直路沿內欄直上如入無人之境,輕勝兩個半身位,捧走新增盃賽冠忠巴士金禧盃。
蔡約翰感情生活一向低調,日前同老婆Coco中環行街濕平,卻被記者野生捕獲,兩口子當時表現恩愛仲一齊hightea,而呢日蔡約翰捧盃開齋,Coco亦有到場,其透視裝露出一截大髀,同老公分享喜悅,兩公婆唔再低調!
四歲新西蘭自購馬「華恩庭」,累積在港五戰兩冠一亞一季一殿,未失過獎金,至於雷神連同之前勝出方廐「會心微笑」、摩廐「和諧氣氛」、賀廐「超凡夢想」在內,截至呢場為止個人四喜臨門,提早勝出呢日騎師王。
今場跑第二係次熱門「龍城勇將」,新勝馬匆出未能成為季內連捷首駒,不過搭「華恩庭」4.6倍大熱Q,卻無驚無險收錢,跑第三係潘頓座騎冷門「天合」,第四名係潘頓造唔到磅棄騎之「金鹿」。