咪以為𠵱家資訊咁發達就唔會出錯，好似濠江嘅博彩公司就喺大前晚擺咗個烏龍，重要麻煩到客人，搞到佢哋買唔到禮拜日啲波。
事緣就係喺大前晚聖加倫對威廉二世嘅圖圖盃賽事上，前者喺補時階段入咗一粒而贏一比○；點知博彩公司就收錯風，以為係○比○，於是就派彩畀買下盤威廉二世嘅人。但係當佢哋知道出錯之後，就嗱嗱臨凍結有買嗰場波嘅客人嘅戶口。
老實講，博彩公司咁做都好啱，之但係佢哋嘅辦事效率唔係太高。事關俾佢哋凍結咗戶口嘅客人，連禮拜日啲波都買唔到，而博彩公司方面亦做少咗生意；今次損失嘅當然係博彩公司嘅商譽同客人嘅信心啦。

謝暉潑李鐵冷水
如無意外，李鐵會喺稍後起程到愛華頓展開英超聯旅程，雖然只係外借，但總算如願以償。之但係，前國腳謝暉就日前接受電視台訪問時，不但冇鼓勵自己友，重話李鐵呢類防守型中場球員喺歐洲大把，重引埋踢法相近嘅丹麥中場杜夫亭喺漢堡無得踢做例子㖭。無錯，我求大俠都覺得李鐵唔易喺英超立足，之不過謝暉咁快講呢啲說話，少少鼓勵都無，唔通佢無得踢世界盃啖氣重未消？