無綫高層樂易玲後日59歲生日，佢今晚提前喺大坑搞生日P，花旦小生都撐場。樂易玲今晚7時多親自駕駛到場，佢仲帶埋兩個兒子同來，着住白色套裝嘅樂易玲心情大靚，佢見到門口傳媒，佢話：「今日未係正日，趁住星期五，同事同朋友可以早啲嚟玩開心啲。」問到佢嘅生日願望？樂易玲話：「身體健康，工作順利，o依家最緊要身體健康。」樂易玲甫到，近日爆婚變嘅詹秉熙、吳岱融、鄧佩儀、翟威廉、周志康、丁子高、劉偉強等緊接到賀。

樂易玲話呢排搞大台劇《使徒行者3》，將於下月2號出發西班牙，佢話：「我唔使去，但好多嘢要做，佢哋去到14、15號先返，今日唔理住，盡情玩咗先。」有消息指今日無綫裁員，樂易玲話：「我有聽到李生（李寶安）點講，呢個唔係一個突然決定，咁大間公司，所有嘢有計劃、有planning。近來增加咗好多人手，需要有啲調整，相信電視圈、電影圈一路存在唔夠人才問題，同事出咗去都會有好發展。」到底受影響員工有幾多？樂易玲話：「唔係太多，TVB咁大間機構，連埋藝員有四、五千人，其實每一步都經深思熟慮，唔會貿貿然，總言之，我深信台前幕後都好多精英，我頭先所講電影圈成日存在人手不足，相信佢哋出到去，一定搵到好發展。」

精選娛聞，喺晒《娛果》
http://fb.com/appledailyent