灣仔華潤大廈新光酒樓執笠，近一百六十名員工追欠薪?遣散費五百萬元，希望不大，最後可能要由破產欠薪基金睇數，代僱主執手尾。酒樓雖有多間，但因飲食業嘅公司組織架構較為複雜，每間酒樓有唔同嘅股東，所以集團內某酒樓拉閘，唔等於其他酒樓唔掂，每間酒樓嘅帳目係獨立核算嘅。
灣仔新光開業二十年，以前相當好景，賺落唔少，最近據講每個月蝕二百萬，點解一聲話執，五百萬元都畀唔起呢？實在對啲夥計唔住；與此同時，經營二十年嘅東海海都集團面對同樣情況，手法完全唔同。

鍾錦師傅話近來一個月蝕千二萬，情況危急，好彩以前賺落，每個月撥十萬元作遣散費儲備，現在見勢色唔對，恐怕再蝕落去，儲備都冇埋，於是鍾錦立即與大股東（何添、徐國烱、冼為堅等）商量，得到批准，即時遣散五百幾名員工，依勞工法例做到足，派咗二千零七十幾萬畀所有夥計，等大家無後顧之憂。員工收妥遣散費之後，再減薪簽新約，重新組隊，輕裝上陣，再與逆境搏鬥。
鍾錦嘅做法，可謂有情有義，照顧現實，顯露咗平日理財謹慎嘅作風；與灣仔新光相比，新光員工做咗二十年，而今得個桔，你話邊個手法高明呢？飲食業每多陋習，賺錢時好大喜功，盲目擴充；蝕本時拍吓屁股一走了之，由其他企業透過商業登記費嚟找數，實在令人憤怒！