韓國人氣男團JYJ成員咁多年嚟都冇公開過自己嘅感情生活，不過噚日有韓國網民就踢爆成員金俊秀原來私藏咗個女友，仲特登開咗個Instagram嚟放一輯佢兩個嘅相。

當中有「女主角」嘅單人相之外，亦有俊秀同佢兩個喺埋同一間房以及一齊睇景嘅背影相。

網民仲公開咗張「女主角」夜媽媽望住個泳池嘅相同俊秀喺濟州島間酒店嘅相做對比，暗示「女主角」曾入住過間酒店。

網民亦轉貼咗張「女主角」曾經公開過一間有聖誕樹喺廳嘅相，正正同俊秀自己屋企個擺設一模一樣，擺明話俊秀「引女入室」。

唔止，網民仲公開咗一張疑似係同俊秀以及「女主角」對話嘅一張cap圖，當中「女主角」仲好似好不滿網友公開佢同俊秀嘅戀情，叫對方即刻刪除所有相之外，俊秀亦都叫網民唔好公開佢哋嘅對話。

而相片公開之後，網民們都反應好大，當中好多人仲對「女主角」作出評論，有人話佢有機心「意外」公開戀情之外，亦有人話佢似足一個「吹氣公仔」。