【新增河莉秀Ig內容及鄭英振接受傳媒訪問內容】
曾演出港產片《桃色》嘅韓國42歲變性藝人河莉秀，上月19號係佢同老公鄭英振結婚十周年嘅大日子。

不過今日韓國傳媒就驚爆河莉秀已經同老公鄭英振協議離婚，結束十年婚姻。據知鄭英振嘅事業失敗對兩人嘅感情有好大影響，加上經濟上嘅困難，同埋性格差異，令兩人決定離婚。

河莉秀與鄭英振於2007年5月19號結婚，老公比佢細6年，當年因為河莉秀係變性人身份，所以二人嘅結婚消息十分轟動。而河莉秀平日都有喺Instagram晒靚相，但鮮有上載同老公嘅合照或者老公嘅單人相。

至於離婚消息傳出後，有指因為老公事業失敗先離婚，河莉秀即透過Ig澄清，強調老公事業失敗唔係導致離婚嘅理由，亦請大家停止呢啲唔係事實嘅推測，河莉秀強調同老公一直彼此相愛，即使0依家大家都係互相關注對方嘅Ig，仍然會係最親近嘅朋友，之後亦會互相為大家應援。由於唔少網民喺河莉秀Ig留下惡評，所以河莉秀亦話會對呢啲惡評會對佢哋作起訴。

而鄭英振就喺離婚消息傳出後接受韓媒訪問，佢確認離婚消息，指二人於一個月前協議離婚，已經提交晒所有文件及整理好關係，二人亦沒有再聯絡。同時坦言佢本身有很多生意，當中有啲生意很差，令到河莉秀好困難。同時因為兩公婆各有各忙，自自然然就變咗甚少交流嘅狀態。鄭英振話以前佢哋都計劃領養，但考慮到小朋友嘅將來，最終都打消咗呢個計劃。