【新增圖片】

今晚7時13分，阿嬌同老公賴弘國（Michael）十指緊扣出閘，一個白帽，一個黑帽，打扮明顯經過悉心安排。

面對大批傳媒包圍，Michael顯得有點不習慣，賴太就一派淡定，負責應對傳媒。

問阿嬌身份是否仍是準賴太，阿嬌就話：「其實我都話嗰個唔係一個……即係我哋真係係未簽紙，但因為我哋真係一齊嘅時間唔係話太長，所以想有個美好嘅共同回憶，所以同所有嘅好朋友想聚埋一齊，留一個好好嘅片段，之後諗住喺香港嘅婚禮就會播俾大家睇。」

至於香港舉行婚禮的日子，阿嬌表示係十二月：「係十二月，唔係九月，但係未搵到地方。所以確實嘅日子仲未可以話到俾大家聽。我唔係刻意隱瞞，希望大家體諒。」

老闆楊受成早前表示會包起阿嬌嘅婚禮，阿嬌笑：「美國嗰個唔係，香港嗰個先係。」楊生仲話送物業做賀禮喎，阿嬌就答：「如果老闆話係就係0架喇！」

問阿嬌習慣俾人嗌賴太未？佢就甜笑不語，兩公婆又對望，然後猛話好緊張。講番美國個party，賴弘國唱咗首《愛很簡單》送俾阿嬌，事前練習多久？佢就話：「因為自己不是專業，現場全部人都是專業，所以當時很緊張。」咁阿嬌滿唔滿意老公嘅歌喉？佢就話好滿意。

阿嬌話喺美國舉行party後，去咗好多地方，包括日本同台灣：「叫做返一返屋企。」婚後賴弘國會搬來香港嗎？阿嬌就話：「我哋兩個都兩邊飛。」至於會否喺台灣舉行婚禮？佢就話唔會，只會舉行party。

問賴弘國工作上會否唔俾阿嬌再拍性感戲？阿嬌聞言即搶答：「不嬲都冇性感過。」男嘅就話：「她開心就好。」減產？阿嬌笑了笑：「唔覺得有減少到。」

阿嬌仲話：「佢送我返嚟，聽日就走喇！」