記者日前登門家訪劉女士，她剛由鄰近幼稚園接女兒放學回家。容顏憔悴的她向記者歎謂﹕「屋企樓下幾間專做消夜打冷生意嘅食店，晚晚好嘈，經常有人打架，搞到治安好差。呢度租金又唔平，連管理費加埋要成三千幾蚊，所以最近收到通知有得上樓，公屋單位嘅租金比𠵱家平一半，環境又好得多，我真係好開心；不過一諗到搬屋要用好多錢，我根本負擔唔起，就覺得好頭痛！」

離婚後生活陷困
三十六歲的劉女士，八九年與從事文職的阿平共諧連理，四年前她誕下幼女後，為悉心照顧女兒，遂辭去售貨員工作。豈料阿平近年因有外遇離婚，致令劉女士與兩名女兒頓失所依，生活陷困。
「兩個女重細，所以我離婚後想出去打工都唔得，惟有靠綜援生活。」劉女士一對女兒現年四歲及十歲，分別就讀幼稚園低班和小學五年級，學業成績中等。「大女今年功課深咗，最怕讀英文，可惜我讀書唔多，唔識教佢，又無錢請補習老師，惟有希望盡快喺社區中心搵到義工幫囡囡補習，等佢打好英文基礎，唔會追唔上學校程度。」
劉女士苦着面續歎謂﹕「呢兩年每逢轉天氣，我對手腕同啲手指就會又腫又痛，醫生話係類風濕症，每次覆診淨係畀止痛藥我，作用唔大，我惟有自己搵藥油搽，希望啲風濕唔會愈嚟愈嚴重。」