鄉議局委員廖書蘭今午喺鄉議局副主席林偉強陪同下與記者茶聚，介紹佢本新書《被忽略的主角—新界鄉議局發展及其中華民族文化傳承》，由於本書講及唔少鄉議局歷史，林偉強話應該送本畀特首及一眾高官睇睇，令佢哋解決新界問題時，有更多相關知識。

講起政府解決新界問題手法，林偉強話前特首梁振英任內對原居民唔係好支持，亦唔係好認識新界情況，至於現任娥特嘞喎，就主要用返多年政務官思維做嘢，咁即係好定唔好？

廖書蘭仲預告，希望明年年底再出版一本名為《劉皇發的故事》新書，透露書中訪問咗唔少發叔身邊人，包括發叔親人、同村兄弟、以及幫發叔揸咗40年車嘅司機等，當中有唔少趣事，包括原來發叔細個原來養過一隻了哥，每當發叔返屋企時，隻了哥就會叫「發哥返嚟」，氹得發叔相當開心。

至於發叔司機更有段難忘經歷，就係當年「魔警」徐步高被警方擊斃後，警方曾要求見發叔同佢個司機，原因係警方發現徐步高紀錄咗發叔車輛出入地方同車輛顏色，相信徐嘅下一個目標，可能係發叔喎！