英超有隊波對小動物充滿愛心，從天鵝、狐狸到老虎都照顧有加，同愛護動物協會一樣咁貼心，佢又係行俠仗義嘅羅賓漢，簡直集大愛左膠於一身……之唔係講緊利物浦囉！紅軍上周六啱啱主場勇挫阿仙奴3:1，聯賽至今輸過5場，對手分別係般尼、般尼茅夫、史雲斯、侯城同李斯特城，全部係12位以下嘅球隊；反觀佢哋對住其餘「Big 6」表現超卓，除咗雙殺阿仙奴，對車路士同熱刺都係一勝一和，仲有兩和曼聯同主場贏曼城嘅佳績，9戰攞到19分，如果對弱旅失少啲分，話唔定而家……可惜呢啲嘢冇得講如果，利物浦雖然暫時升上第3，但失分仍然多過曼城同阿仙奴，來季歐聯入場券有排都未到手！

領隊高路普都承認，坐利記呢架過山車，少啲心血都唔掂：「我哋就係一架過山車，實在經歷超多起伏。我唔想咁不穩架，但呢個係成長過程嘅一部份。」嗱，利物浦下周日繼續喺晏菲路出擊，迎戰今季作客攞得兩分嘅般尼，睇吓佢哋係咪咁純真，繼續劫富濟貧？