美國前晚在感恩節假期前，成功收復早一晚的失地，其經濟數據終有復蘇勢頭，上周新申領失業救濟金人數及持續申領人數齊跌見兩年新低，置業按揭申請指數亦升至半年來最高，反映美國經濟最脆弱的兩個範疇，就業及房屋市場都有明顯改善。近日每當美國經濟顯示有復蘇苗頭，都會有批人走出來話QE2有可能縮水，甚至話有機會終止，似乎有心製造輿論壓低股市，但唔知係佢地放咗假還是無人再理，美股差不多是由頭升到尾，上升150點，表現頗為理想。
其實以筆者話，如果美國真的因為經濟有改善而取消QE2，對投資者來講反而是更好的消息，始終QE2只係泵錢出來周圍去炒大個資產泡沫，不停潮漲潮退，信念不夠或是紀律不足的投資者，只會慘成大戶點心，有實體經濟支持，點都好過只係靠公仔紙支撐，揸貨都會揸得安心點。

中美股市表現對辦

另一邊箱，雖然最近有傳由於內地今年7.5萬億元新增貸款目標提早達標，下年新貸目標或會比市場預期低，但A股似乎漸消化調控措施的影響，連續兩日都以最高位收市，技術走勢大有改善，大有調整完畢的味道。
可惜，夾在中間的港股卻斯人獨憔悴，昨日上晝仍見越升越有的氣勢，彷彿重拾動力，但下晝就走晒樣，期指收市只能微升108點，已經連續3日低於50天線，大市成交亦進一步下降，只得744億元，與早陣子日日過千億成交相比，實在顯得冷清。普羅投資者很喜歡找原因解釋大市的升升跌跌，老實說，如果你要士佳解釋為何這兩天港股反彈得如此乏力，我真係搵唔到確切的理由，自己抱着「海嘯來前必先潮退」的信念，對近日弱勢不感驚訝。士佳估計大市仍有機會再下試22808附近或以下，若然此水平依然能夠穩守，該是時候加貨迎接下潮升浪了。

張士佳
寶來證券（香港）董事　投資服務部
mailto:[email protected]