花旗香港一向有唔少家庭友善措施，上星期五就喺觀塘總部搞咗場「員工親子日」，又有遊戲攤位玩，該行零售銀行業務主管李貴莊（Josephine）仲帶埋囡囡一齊出席。魔術師Henry Harrius即席表演憑空變錢，更加炒起全場氣氛，大人細路都拍爛手掌。

今年員工連小朋友有700人參與，平日搵真銀的地方變成親子樂園，員工跑完數之後，有時間同小朋友放鬆吓，都咪話唔開心。華華仲記得，花旗港澳區行長伍燕儀上星期五向員工發內部電郵，話過去6個月員工表現專業，宣佈全港員工明年額外增加1日假期，多1日假期，咪可以多啲陪家人囉！

李華華