與其話DavidWebb係股壇長毛，倒不如話佢係財金圈履歷核實署署長。繼玩具大王蔡志明、真明麗（1868）首席執行官（CEO）曾金穗嘅學歷同博士學位俾佢質疑做假後，阿Webb噚日撰文，繼續踢爆上市公司高層嘅問題學歷，今勻主角輪到蒙牛乳業（2319）創辦人之一兼總裁楊文俊。

招股書指03年獲美碩士

Webb話，根據蒙牛招股書顯示，楊總裁03年喺美國一間叫Barrington嘅大學攞到工商管理碩士學位（即係MBA），之但係，佢話嗰間學校其實只係一間喺花旗國成立、總部設喺阿拉巴馬州嘅「公司」！更甚係呢間「大學」俾美國教育部列入非學院名單，所提供嘅學位係冇認受性。雖然後來04年9月公司賣咗畀人後，改名做UniversityofAtlanta，佢嘅學位已獲承認，但係楊總裁個MBA係03年攞嘅，咁即係有問題喎！
學志雲大師話齋，真的假不了，假的真不了。學歷係真係假無傷大雅，如果再爆多單假奶毒奶，你就算拎住博士銜頭呀，都救唔到公司啦！

李華華
mailto:[email protected]