蘇永康與太太Anita今晚假尖沙嘴洲際酒店舉行婚禮，星光熠熠，到場賓客仲勁過好多頒獎禮呀，包括張學友﹑陳奕迅﹑容祖兒﹑楊千嬅﹑鄭秀文﹑許志安﹑葉童夫婦﹑何超儀與老公陳子聰及謝安琪等等等等，場面墟冚。

至晚上近十一時左右，開始有賓客離開酒店，包括邱淑貞同老公沈嘉偉﹑佢哋同埋張智霖一齊走。

而經常喺喜宴飲到「啤啤夫」嘅葉童與老公陳國熹，離開時又係腳步浮浮，葉童由老公扶樓梯落嚟，葉童high到送飛吻，問葉童係咪飲咗好多？葉童只報以微笑，然後拖實老公離開。

至於何超儀同老公都係面紅紅離開，相信佢哋飲咗唔少呢﹗而君如離開時攤開雙手，扮「平衡」落樓梯，問佢係咪飲咗好多？佢話：「食咗好多嘢﹗」

另外，據悉祖兒喺婚宴上又接到花球，話時話祖兒上次喺鄭希怡婚禮已經接到花球，今次又「中獎」，唔知幾時先到佢拋花球呢？而陳奕迅就喺婚宴上獻sing贈老友。

鄭秀文仲喺現場上台同liveband唱出《終身美麗》，而Eason及陶喆亦同樣上台，簡直係群星演唱會一樣。