大台爆離巢潮，莫講係小生中生，花旦定中旦，總之可用嘅人（或想用嘅人）所剩無幾，搞到睇夜晚8點幾黃金時段開着電視見到嗰班人，分分鐘到半夜重播時段都仲見到佢哋，如果唔係時裝同古裝啲戲服有分別嘅話，真係以為成晚都係播緊同一套劇。如果加埋晏晝嗰啲「乜乜閒情」同「咩咩VIP」，咁就……

不過，正所謂有危就有機，今日有周刊報道，話陳煒趁住電視台鬧人荒，以42歲高齡簽落7年長約，將備受力捧，包括喺佢拍完手頭嗰套新劇後，仲會開個煮食節目畀佢發揮所長，實行嚟個陳煒版嘅《十二道鋒味》。周刊指佢突然被睇中嘅原因，係因為佢嘅宿敵——「長腿姐姐」萬綺雯（蚊蚊）唔肯簽約做親生女，所以電視台喺冇得揀之下同咗陳煒簽約。

據報道指，蚊蚊同陳煒幾乎鬥足十幾年，兩個同係亞姐出身，今年44歲嘅蚊蚊係89年亞姐亞軍，陳煒則係96年冠軍，兩個都係亞視嘅花旦，又先後過檔隔籬台，不過蚊蚊過檔做女一，陳煒騷價仲要得番喺亞視時嘅一半。而且兩個去到邊都被攞嚟比較，只要同場的話，蚊蚊一定佔上風，佢哋由17年前嘅《我和殭屍有個約會》，到今年嘅《東坡家事》都係咁，陳煒始終都係「二奶命」。

既然蚊蚊同陳煒咁「同病相憐」，蚊蚊仲出晒名好人緣，佢哋應該好friend至係，為乜搞成咁呢？原來係陳煒喺13年前拍過一套亞視劇集《乘勝追擊》，喺一場輪姦戲中，要被臨記舔耳同咬唇，當蚊蚊等同台女藝員被問到有乜睇法時，蚊蚊就一時心直口快咁話：「我都唔認得係佢（陳煒），以為係臨記添！畀我梗係唔制啦，咁核突！」就係咁，陳煒就嬲咗蚊蚊。

周刊報道又指，蚊蚊同陳煒同一班《東坡家事》嘅演員喺無錫拍外景時，蚊蚊同男主角歐陽震華係收工飯鐵腳，就算一大班人，包括王浩信、泰臣（劇中演陳煒老公）等人去食飯，都唔見陳煒有份；而蚊蚊同陳煒喺片場更加唔friend，頂多開工Hi同收工Bye，完全零溝通。亦有指喺無錫期間，歐陽震華同蚊蚊都係親力親為，但陳煒就自僱當地妹妹仔做跟班，擺晒巨星款，同其他演員拉開距離，不過陳煒亦都好識做，成日煲湯畀大家飲，收買人心。

對於陳煒簽約受力捧，佢咁忙未得閒回應，反而嘆世界嘅萬綺雯就回應話：「不嬲簽約都係自己有得揀，今次個新約叫做係部頭約，我一月都會開工同郭晉安拍正劇。我同陳煒咁大個邊會嗌交呢？不過大家朋友圈子唔同就係真嘅。佢咁勤力一個演員，嚟緊有咁多機會，我覺得應該嘅！」

難得上位做女一，唔知陳煒仲肯唔肯被臨記舔耳仔同咬唇呢？