可能有人說一季跑近800場馬，贏少一場半場好閒，但剛周日（2日）開鑼，兩位新丁利敬國及丁冠豪分別打響頭炮兼起孖攞足印象分，而近季甚少贏馬的賴維銘，亦憑「霸勝」開糊。

上述三位騎練在開鑼日贏或不贏馬，今季命途可能差天共地。

早前提過丁冠豪成軍時間較倉卒，加上沒有嫁妝馬，客觀條件是要慢熱，但新人要在香港馬圈企得穩，一來時間不會等人。

加上要俾人先留好印象，所以此刻丁冠豪的馬定必唔好唔跑，兼且一定會實話實說建立正派形象。

最終丁冠豪開鑼日起孖，事前接受媒體訪問時講全日以「銀城福星」餐士最好，結果亦能兌現。

所以，現階段丁廐馬部署越正路越要捧，可同丁冠豪講個「信」字。後晚（5日）丁廐只出「海之濤」及「飛壹般」兩匹李易達舊部。

第三場「海之濤」谷草1000米獨沽一味，上季尾李廐心急贏馬爭續牌，一把年紀的「海之濤」季尾也要密密出賽，5月下旬曾一個月出賽三次，體力應付不來自然得個跑字，亦換來一定程度減分。

目前「海之濤」較上季贏四班谷草1000米低了11分，埋門彈草地細閘活力猶勝兩匹年輕廄侶，明晚出戰強項，可以信丁冠豪明刀明槍。

至於頭場「飛壹般」上季初贏今戰五班谷草一哩，但其後只跑過同程兩次，點解要揀其他路程，真係要問問李易達！

今勻拍跳試閘做足重返勝途，丁冠豪可望又有「飛壹般」演出。