當年今日
關於我們
【踢而優則教】魯爾榮歸皇馬 複製施丹成功方程式?
蘋果日報 2017/06/16 06:06
西甲
皇家馬德里
教練
施丹
魯爾
施丹教波咁掂,下一個到魯爾?
皇家馬德里教練施丹上任唔夠兩季,就帶領球隊贏得一次西甲、兩次歐聯,會長佩雷斯梗係收貨,仲有意複製呢條成功方程式,重召另一位球會名宿回巢:就係傳奇射手魯爾啦!據西班牙《馬卡報》報道,現年39歲嘅魯爾由1994至2010年為皇馬喺各項賽事上陣741場射入323球,為球隊贏得6次西甲、3次歐聯等榮譽,佢將會喺7月3日正式宣佈回歸皇馬,雖然確實頭銜同工作尚未落實,但佢有可能仿照施丹當年步伐,嘗試唔同工作後先獲委任為一隊教練,甚至有可能成為施丹教練團一員!
數吓數吓,原來唔少前皇馬球員退役後,都可以喺球會做番一官半職,好似老一輩有布達堅奴從事商業總監,近代啲就有巴西重炮卡路士做緊皇馬官方電視台主持,「肥哨」朗拿度就係球會大使,古迪同蘇拿利更係教練,即管睇吓魯爾開邊瓣?