【新增內容】
SMAP不歡而散，木村拓哉、中居正廣已落實續約尊尼事務所，而香取慎吾、草彅剛及稻垣吾郎就決定離巢，9月8日約滿尊尼就跟前經理人飯島三智到中國發展。

至於木村方面，今日下午5時許，佢駕車駛到東京調布市時遇上交通意外，當時佢撞向一輛正在等候交通燈嘅電單車，而尾隨車輛亦煞掣不及，導致三車連環相撞，慶幸只係輕微踫撞，意外中充亦冇人受傷。

另外，木村日前同老婆工藤靜香現身代官山，被雜誌《週刊女性》公開夫婦帶埋愛女享受天倫樂。據報道指，當日木村、靜香同埋今年4月升讀高校嘅大女心美幫襯代官山嘅人氣cafe，呢間店舖一件三文治都要百幾二百蚊港元，有同場客人指，木村細女未見同場，至於大女心美就着住小背心，見佢講嘢時就夾雜住日文及英文，洋味十足，而三人閒話家常，現場聽到心美為轉髮型而煩惱，靜香就建議阿女話：「等頭髮長啲不如試吓電鬈？」受國際學校教育嘅心美今年已滿16歲，被指擁有八頭身身材，係圈中最強星二代，一直話有日本藝能事務所想斟心美入行，而14歲妹妹光希都唔弱，目前光希已長得亭亭玉立，早前被拍得拍住媽咪外出，光希穿有透視剪裁嘅連身裙襯高踭鞋，打扮十分成熟。