有些新樓賣得特別好，有些差到離晒譜，這關乎發展商有無傳授「開單秘笈」。先旨聲明，這並不是一本教經紀開單招數的寶典，而只是讓五湖四海的地產代理統一口徑的銷售方針。

所謂開單秘笈，每逢新樓開盤，發展商搞誓師大會，叫齊四大代理行派一千幾百個經紀出嚟企定定，聽呢間樓神嗰間樓后講解樓盤特色、邊啲單位好賣、叫經紀推銷邊種單位先、以至層出不窮驚死買家睇得通的付款辦法，無非就是要統一口徑。你會問，賣樓啫，佢有佢賣，我有我賣，使乜人人同一套話。要知道，你估經紀個個高學歷咩，咪都是人講佢又講，就要發展商度一套阿豬阿狗都可以講到宇宙最強的銷售方程式。

一個人講個盤有ABC的優點，你唔信，一千個經紀講ABC優點，除了謊話講成真理，亦無瑕接收XYZ的缺點。誓師大會振奮士氣為名，叫各大行交人為實，逼使各區董、區頭派兵，即派人洗樓、派傳單、做街霸，務求全城熱話，營造非買不可的氣氛。

賣樓從來賣氣氛，水份飛、排隊人龍，洗腦洗到你墮入羊群，總是有種遲買會貴的錯覺，令你唔多去諗價位抵唔抵，更唔會理落定金的後話，包括壓力測試、上會。結果總是看見新盤撻定慘案，無知買家成為熾熱氣氛賣樓下的羔羊。

絕大部份新樓是高溢價，天真地以為唔住都可以長線收租，到收租時才發現租金冚唔到供款，還要交昂貴管理費，都仲未計差餉地租。計過度過，明明蝕緊都還是覺得層樓將來會升，只可以說，樓神好嘢！

小師兄

-----------------------------

掌握理財智慧 感受生活品味

investMAN全新網頁 優雅登場

-----------------------------

部署退休 輕鬆達至財務自由

點擊即睇《退休理財天書》

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！