由河正宇、車太鉉、朱智勛、李政宰等主演，被視為今年底最受注目嘅韓片《與神同行》，上周三喺韓國開畫，下月11日就會在港上映。

《與神同行》於韓國開畫當日即吸引逾40萬觀眾捧場，因為聖誕佳節，票房節節上升，噚日上映六日累計觀影人次突破咗400萬人次，噚日聖誕節有逾121萬觀眾支持，截至韓國時間今日下午3時15分、即《與神同行》上映第七日，累計觀影人次破500萬，一眾主演河正宇、李政宰、車太鉉等合體賀觀影人次破500萬人次。

《與神同行》亦登上台灣周末嘅票房冠軍，導演金容華對於電影喺台灣有好票房，表示：「影片登上台灣票房第一位意義非常重大，就好似證明好韓國嘅事情都可以係好全世界嘅事情。我永遠唔會忘記呢個意義，並會努力製作電影嘅續集。」

另外，於片中飾演陰間月值使者嘅童星金香起，日前就於Instagram公開長髮嘅照片，加上一雙精靈大眼，獲網民大讚可愛。

至於有傳朱智勛將粉絲贈送嘅禮物轉送畀金香起而引起爭議，金香起就於Ig澄清，解釋有粉絲送禮物畀佢時佢剛好唔在場，於是拜託朱智勛前輩代為收下禮物。

更多韓流，喺晒《娛果》
http://fb.com/appledailyent