當年今日
關於我們

【李八方online】金刀梁請老友上節目 徐立之曾傳不和都有份

蘋果日報 2018/06/21 17:38

金刀梁徐立之梁智鴻醫管局港大

有「金刀梁」稱號嘅外科名醫梁智鴻,出年就踏入八十歲做「八十後」,但依然相當有魄力,唔只繼續操刀做手術,最近仲同有線電視合作拍攝節目《金刀會客》,邀請老朋友上嚟傾吓計,幫社會問題斷症。嘉賓名單相當有份量,第一集有梁智鴻細佬、醫管局主席梁智仁。
兩兄弟分別都做過醫管局主席,一個引入急症室收費,另一個就推急症室加價。梁智仁話,急症室收費由100蚊加到180蚊大半年,已經見到成效,非緊急病人跌5%到大約六成,嚟緊希望可以再跌到五成左右。梁智鴻話,節目唔會淨係講嚴肅嘢,都會傾「家事」,例如細佬朝朝都同愛犬一齊行山咁吖,分享健康生活。
其餘嘉賓仲有梁智鴻多年戰友、行政會議召集人陳智思;工聯會榮譽會長鄭耀棠,同傳過意見不合嘅港大前校長徐立之。徐立之2011年宣佈不續任,有指佢係畀當時嘅校委會主席梁智鴻勸退。事隔7年,兩人喺傳媒飯局被問到呢段往事,徐立之笑笑口話,唔啱傾係「大家講嘅啫」,佢同梁智鴻不知幾多嘢傾。
徐立之又話,一個城市有兩間醫學院會「打到飛起」,尤其香港資源少,樣樣都要競爭,不過講到合併,佢就耍手擰頭,話合作就夠喇,講合併會有餘悸。前教統局局長李國章曾經提出中大、科大同教院合併,引起高教界反彈,似乎就係徐立之口中嘅「餘悸」。