台灣倒扁氣氛熾熱,工聯會嘅王國興月中(12至17號)適逢其會,去台灣考察一個名為「認養古迹」嘅活動,亦同當地「泛紫」(一個支持弱勢社群嘅組織團體)成員會晤溝通。唔講唔知,「泛紫」頭目簡錫佳係「倒扁」副總指揮,所以王國興可以輕易去到台北火車站嘅倒扁指揮中心見識,佢話只距離總指揮施明德最多20步,不過就冇辦法埋身同施明德(紅箭嘴)傾偈,惟有影張相留念啦(圖)!
佢話今次台灣之旅畀佢好大啓發,就係一個當權者一定要廉潔,否則就一身蟻。佢仲發現台灣嘅弱勢社群好無助,所以套用番嚟香港,就一定要立法定最低工資,所以八方幫口加句,唔關心民生嘅都係死路一條㗎!王國興提供圖片