大家仲記得早排大陸帝吧出征香港打反送中網戰,結果出師未捷身先捐,俾香港網軍起底兼幫佢哋報名捐器官,帝吧網軍成為恥笑對象,估唔到捐器官風氣吹到香港,經民聯立法會議員梁美芬噚日喺fb發帖,話自己個人資料被公開,仲有人拎佢嘅資料去網上登記捐贈器官。原本梁美芬公開件事,梗係想人為佢呢個受害者抱不平,但點知今次揭發佢原來一直冇參與器官捐贈計劃,結果引嚟好多網民鬧佢作為建制派,竟然冇帶頭響應政府呼籲?
話說梁美芬噚日喺fb發帖,話收到熱心市民通知,有人係Telegram群組公開了佢嘅個人資料,包括身份證號碼、電話號碼同住址,仲有人冒用佢嘅身份喺網上登記器官捐贈,佢仲話6月時已經有網民惡意公開所有建制派立法會議員個人資料,佢近期亦試過深夜收滋擾電話,因唔想加重警方工作,所以冇報警,但今次有人冒用佢個人資料捐器官,佢覺得不能再啞忍,亦怕有人用佢個人資料作不法用途,所以決定報警。