贏盡世界盃、歐國盃、西甲、歐聯，艾比路亞總算無憾退役！曾經效力皇家馬德里、拉科魯尼亞同利物浦嘅34歲西班牙右閘艾比路亞，去季喺韋斯咸表現跌watt之餘亦鬱鬱不得志，各項賽事只係上陣4次，季尾亦遭「槌仔幫」放棄，最終佢接受嚟緊周末出版嘅西班牙《馬卡報》訪問時宣佈掛靴：「雖然我嘅體能仍然能夠作賽，但係時候講再見了。」雖然掛靴後方向未定，但佢就表示樂意重返皇馬擔任一官半職。

艾比路亞出身自薩拉戈薩同皇馬青訓，2004年首次喺「銀河艦隊」一隊亮相，其後轉投拉科同利物浦，2009年以500萬鎊轉會費重返皇馬，為球隊贏得一次西甲、兩次西盃、兩次歐聯、一次世冠盃、一次歐超盃等殊榮；呢位擁有56頂西班牙「喼帽」嘅右閘，亦係2008歐國盃、2010世盃同2012年歐國盃冠軍隊成員。