當年今日
關於我們

地產多聲道:寶雲匯入伙有專家陪驗樓

蘋果日報 2004/01/10 08:00


𠵱家業主對住宅樓宇交樓嘅要求,比以前高咗好多,發展商要完全滿足業主嘅要求,一啲都唔容易。嘉里最快下個禮拜可開始交樓嘅荃灣寶雲滙,特別邀請測量師行黃山建業事務所,作為樓宇質量控制管理顧問,噚日安排記者親身體驗整個收樓程序。
首先,所有業主都會喺交樓大使陪同下進行各項驗收程序,單位大門綁上紅色蝴蝶結歡迎新業主。檢驗由門鐘開始,然後係對講機、電燈、插頭、冷氣機,以至門、窗、地板,一一細心驗查。完成所有手續後,業主會被邀請到由宴會廳改裝嘅臨時交樓處,已經準備好魚子醬、紅酒同咖啡等美食畀業主享用。
今次嘉里首次聘請顧問,肩負起監督旗下樓盤執漏程序,發展商承認,此舉係同現時市場競爭激烈、業主對居所質素要求日漸提升有關。

信和商場搵Twins催谷
農曆新年就快到,商場大業主又要搞節目吸引消費者,梗唔少得送應節禮品。信和旗下包括大角嘴奧海城商場,同屯門黃金海岸購物商場等十個商場,除咗送應節禮物外,重搞咗個「金猴獻瑞」數目競猜遊戲,估中可以得到足金金猴一隻。另外,發展商又請到藝人表演,包括Twins、Cookies、石修同陳冠希等,重有風水師麥玲玲。
講開商場,聽希慎興業商舖租務部總經理陸穎思講,旗下銅鑼灣利園二期,二樓嘅兒童天地噚日已經開幕,咁啱適逢農曆新年,所以會搞一連串活動,主題當然係同小朋友有關。花費一億四千萬翻新嘅利園二期,今年第二季會全面啟業。
九倉利是封係港人心聲
重有兩個禮拜就到新年,蘭西收到九龍倉送嚟嘅兩盒禮物,原來全部都係金光閃閃嘅利是封。
利是封設計好清雅,除以金色托底外,簡簡單單印有四個大字「金銀滿屋」。香港經濟差咗咁耐,相信港人會特別鍾意呢四個字。
每年呢個時候,好多公司都會送利是封畀客戶,既可聯誼,又可以𠱁吓客戶開心,而客戶派利是畀人時,就變相同公司宣傳,可謂一舉兩得。

恒益員工全部要識普通話
恒基旗下嘅物業管理公司恒益物業管理,兩年前已經為管理層提供普通話課程,重請咗幾個北京導師教授課程,所以啲高層個個都講得一口流利普通話。但係中下層又點呢?
恒益執行董事孫國林話,最新計劃係撥出多啲資源做普通話培訓,增設比賽同考取證書制度等,鼓勵員工多啲參與同提高學習興趣,務求全部員工都識得聽同講,方便同內地客溝通。
由恒益負責管理嘅屋苑超過一百六十個,單位逾五萬五千個。
蘭西
電郵地址:[email protected]