𠵱家業主對住宅樓宇交樓嘅要求，比以前高咗好多，發展商要完全滿足業主嘅要求，一啲都唔容易。嘉里最快下個禮拜可開始交樓嘅荃灣寶雲滙，特別邀請測量師行黃山建業事務所，作為樓宇質量控制管理顧問，噚日安排記者親身體驗整個收樓程序。
首先，所有業主都會喺交樓大使陪同下進行各項驗收程序，單位大門綁上紅色蝴蝶結歡迎新業主。檢驗由門鐘開始，然後係對講機、電燈、插頭、冷氣機，以至門、窗、地板，一一細心驗查。完成所有手續後，業主會被邀請到由宴會廳改裝嘅臨時交樓處，已經準備好魚子醬、紅酒同咖啡等美食畀業主享用。
今次嘉里首次聘請顧問，肩負起監督旗下樓盤執漏程序，發展商承認，此舉係同現時市場競爭激烈、業主對居所質素要求日漸提升有關。

信和商場搵Twins催谷
農曆新年就快到，商場大業主又要搞節目吸引消費者，梗唔少得送應節禮品。信和旗下包括大角嘴奧海城商場，同屯門黃金海岸購物商場等十個商場，除咗送應節禮物外，重搞咗個「金猴獻瑞」數目競猜遊戲，估中可以得到足金金猴一隻。另外，發展商又請到藝人表演，包括Twins、Cookies、石修同陳冠希等，重有風水師麥玲玲。
講開商場，聽希慎興業商舖租務部總經理陸穎思講，旗下銅鑼灣利園二期，二樓嘅兒童天地噚日已經開幕，咁啱適逢農曆新年，所以會搞一連串活動，主題當然係同小朋友有關。花費一億四千萬翻新嘅利園二期，今年第二季會全面啟業。