今日亞視就會舉行員工大會，「六合彩之子」蔡國威就喺1點半左右去到亞視，問到佢收到嗰半份糧未，佢就坦然話未，佢話相信係因為唔同銀行嘅問題，又話未問其他同事收到未。

今日蔡國威出席員工大會，主要係想知公司嘅新進度係點：「如果有提問環節，我想問管理層公司嘅情況係點，對公司都仲有希望，因為會計師都話要一至兩個月搞掂啲數，如果回應係令人滿意，都想畀啲時間公司。」

問到蔡國威係唔係冇糧出都可以接受？佢就話：「都希望公司可以清咗兩個月先，聽聞一兩個星期就可以搞掂。」問到佢有冇聽過公司有同事話有經濟困難？佢指每個家庭都有困難，都係希望一兩個星期可以搞掂解決拖糧問題。

近期有指蔡國威有份做嘅節目《星動亞洲》會停播，佢都話問過監製，真係會停播，問到會唔會有影響？佢就話：「都會有影響，藝人始終都係計show，0依家生活上慳得就慳，已經用緊啲積蓄，自己又唔係幾百萬未開頭。」