當年今日
關於我們

國際網絡:送花嘥錢唔敢唔送

蘋果日報 2007/05/22 00:00


女仔鍾意收花,男人就算唔識花語,都要大破慳囊投其所好。不過,有女網友喺《MSN》討論區話,送花嘥錢兼阻地方。
CRONEWITCH話:「我唔鍾意收花,亦都冇咩地方可以擺花,只係隨意放喺客飯廳,等佢謝咗扔掉就算,我亦只會喺出席喪禮時先會買花。」
johnphx更直言畀錢買花好比燒銀紙,「用幾十蚊美金買紮花返嚟,睇住佢一個禮拜就死,索性攞張銀紙去燒咪仲痛快。不過,老婆偏偏係愛花之人,所以就算啲花幾貴,都要買嚟𠱁佢開心!」
Peaches9404就覺得送花畀愛人其實好「行貨」,只有懶人先會做,嘥錢反而係其次,佢話為情人花心思、製造多啲意外驚喜先夠浪漫:「有時不妨買支愛人鍾意嘅護膚品,臨瞓前拎出嚟送畀佢,溫柔咁幫佢搽上身;又或者買一張同花價差唔多嘅現金禮券,畀佢去spa,鬆弛神經。」
博紅顏一笑 都要撐
不過,始終面子攸關,如果佳節收唔到花,有啲人會怕瘀,不惜自掏腰包買花送番畀自己。Janbeach就分享咗一段搞笑經歷:「有個同事因為同老公鬧交,情人節冇花收,於是自己訂咗紮花送去公司,以為神不知鬼不覺。點知佢懶醒講咗畀個超多嘴嘅朋友聽,成件事即刻通晒天,反而只有佢蒙在鼓裏。」
事實上,從經濟角度嚟講,鮮花擺幾日就會謝,價錢又貴過膠花、絲花,好多男士都會覺得好唔抵,但古時有烽火戲諸侯,都只係為博紅顏一笑啫,如果心愛嘅另一半喜歡芳香嘅鮮花,偶然使多少少錢去維繫一段感情,又有乜所謂哩!