唔知係好日抑或係好意頭（三一八），噚日有二十七家上市公司齊齊派成績表，搞到八方東撲西撲，最大一單梗係李超人嗰兩隻長實和黃啦，其次係排名中資電訊股賺錢榜首嘅中國移動。
不過，由榮太子任總舵主嘅中信泰富記者會，財記亦唔會錯過，佢雖已居港多年，攞埋三粒星身份證，但可能一直冇融入香港，啲廣東話似乎就進步不大，唔知係咪為表示佢都飲香港水，流香港血，昨日佢堅持用廣東話主持記者會，不過到會議尾段，發覺記者又問返轉頭，佢至有啲唔好意思地笑着承認：「剛才我已講過，可能我啲廣東話講得唔係咁好」。
雖則舊年業績倒退六成六，但榮太子心情仍靚靚，皆因公司前景可期也，問佢今年睇好邊一瓣，佢竟將所有業務數晒出嚟，話係全部都睇好，各位中信泰富股東，自己執生嘞。


傳真︰2623-9278
電郵︰[email protected]