日本經典二人女子組合Wink曾於廿多年前威盡歌壇，佢哋嘅成就比起香港當年嘅夢劇院、Echo及Face To Face有過之而無不及，至今仍然係日本樂壇嘅二人組合Icon。Wink早於1988年出道，當年憑翻唱Kylie Milogue歌曲《Turn It into Love》嘅單曲《停不了的愛~Turn It Into Love~》大賣逾64萬張，之後更以代表作《寂寞的熱帶魚》勇奪日本唱片大賞嘅金曲金獎，直至1990年發行嘅5張細碟都連續獲得Oricon銷量榜冠軍，並以孖公仔形象紅極一時。

Wink由現年48歲鈴木早智子及47歲嘅相田翔子組成，二人走紅後卻好快被樂迷嫌棄，當人氣滑落後決定單飛發，不過兩人際遇各異，相田翔子已婚嫁星二代、任職皮膚科醫生嘅相澤宏光，仲有個幾歲大囡囡，目前在港上映嘅新片《東京喰種》亦有份參與演出。相反隊友鈴木早智子就較為堪坷，唔止淪為脫星，09年佢服食過量安眠藥送院，同年更宣佈加入AV界，之後更搭上合作嘅已婚男星津田英佑，長達4年嘅不倫戀令鈴木早智子人氣直插谷底，近年已消失藝能界。

趁住Wink就快30周年，日前有報道指二人正計劃明年4月重組，既推出相隔23年嘅新歌又會開演唱會。雖然話相田翔子同鈴木早智子依然保持友好關係，不過相田翔子日前坦言見到呢段報道都嚇咗一跳，自言連自己都唔知道重組一事。相田所屬事務所回應指，Wink重組未有任何決定。近日再有報道指，查實鈴木早智子十分等錢使，佢向前事務所追討約20萬港元餘數酬勞，前事務所代表受訪表示早已還清餘數，但最近佢哋又再收到鈴木早智子嘅短訊，繼續向舊公司追債，相信早智子正生活拮据，更先斬後奏放風話Wink將會重組。不過，相田翔子方面似乎未肯妥協，亦免得同呢位麻煩隊友有任何錢銀瓜葛。