好耐冇鍾瑞明消息，幾乎唔記得咗佢。噚日聽到佢有新動向，就係正式加入亨達集團（佢之前係獨立非執董，嚴格講唔算係僱員），出任執行董事、董事總經理；早前鄧炳森個副主席位亦由佢坐埋。
聽講亨達喺噚日開董事會，拍板之後即刻宣布，任命更即日生效。老闆鄧予立好興奮，事關亨達一直做外滙，近年涉足基金及財富管理生意，以鍾瑞明在呢一瓣嘅經驗及人脈，應該可以幫到手。

鍾瑞明係火紅年代港大高材生，好早就愛國，後來做土地基金總裁，直到土地基金併入外滙基金，佢就去咗中銀同怡富，又兼過做房協主席及首屆行會成員，在政商界嘅履歷冇得頂，有金紫荊，又係全國政協。奈何離開怡富之後，一直冇乜正經嘢做，可以講係壯志未酬。今次加入亨達，有機會大展拳腳。
鄧予立話好歡迎鍾瑞明加盟，相信佢喺中港兩地政經界嘅人脈，加埋基金業嘅專長，可為亨達注入新動力。鄧予立當年在中資銀行炒滙，出晒名眼光準確，咁佢搵人都唔會睇錯眼嘅。
李華華
讀者如有任何意見或報料，歡迎發送電郵至[email protected]。